(NI NOEL ABUEL)

PINAGHAHANDAAN na umano ni Senadora Leila de Lima ang mas detalyadong listahan ng mga taong nasa likod ng pagpapakulong sa kanya dahil sa akusasyong sangkot ito sa illegal na droga.

Kinumpirma ng kanyang chief of staff na si Atty Fhillip Sawali lna na mayroon ang senadora na mas komprehensibong listahan ng mga opisyal ng administrasyon at iba pang mga personalidad na may kinalaman sa pagpapakulong dito.

Aniya, sa oras na matapos ang listahan ni De Lima ay posibleng mapabilang sa mga iba-ban sa Estados Unidos ang mga pangalan ng mga dati at kasalukuyang opisyal ng pamahalaan matapos ang pagkakalagda ng US 2020 national budget na naglalaman ng ganitong uri ng probisyon.

Ayon kay Sawali, mahaba ang listahan na ginawa ni De Lima lalo na’t napakametikuloso umano nito.

Sinabi pa nito na bawat entry aniya rito ay mayroong sapat na patunay at paliwanag kung paano ito nasangkot sa pagpapakulong sa mambabatas.

Matatandaang una nang naglabas ng inisyal na listahan si De Lima na kinabibilangan nina Pangulong Rodrigo Duterte, Presidential Spokesperson Salvador Panelo, dating Asec. Mocha Uson, dating House Speaker Pantaleon Alvarez, at dating Justice Secretary Vitallano Aguirre.

Gayundin,  kasama sa listahan ang iba pang pro-Duterte bloggers na sinasabing ginamit umano para siraan si De Lima.